വ്യാജരേഖകൾ ചമച്ച് തട്ടിയത് കോടികൾ; റെജി മലയിലിനു പിന്നിൽ വൻ സംഘമെന്ന് സംശയം’

കൊച്ചി∙ വ്യാജ രേഖകൾ ചമച്ച് കോടികൾ തട്ടിയെടുത്ത സംഭവത്തിൽ അറസ്റ്റിലായ റെജി മലയിലിനു പിന്നിൽ വൻ സംഘമെന്നു സംശയിക്കുന്നതായി പൊലീസ്. ബാങ്ക് ഉദ്യോഗസ്ഥരും നോട്ടറിമാരും വ്യാജ രേഖ തയാറാക്കുന്നവരും എല്ലാം ഉൾപ്പെട്ട സംഘമാണ് തട്ടിപ്പു നടത്തി വന്നിരുന്നത് എന്നാണ് പ്രാഥമിക അന്വേഷണത്തിൽ തിരിച്ചറിഞ്ഞിരിക്കുന്നതെന്ന് അന്വേഷണ സംഘത്തിലെ ഉദ്യോഗസ്ഥർ വെളിപ്പെടുത്തുന്നു. സംഭവത്തിൽ കൂടുതൽ പരാതിക്കാർ ഇതിനകം രംഗത്തെത്തിയിട്ടുണ്ട്. ഇയാളുടെ ഭാര്യയ്ക്കെതിരെയും പൊലീസ് അന്വേഷണം നടക്കുന്നുണ്ട്. 

അതേ സമയം കേസിൽ കേന്ദ്ര ഏജൻസികളുടെ അന്വേഷണം വേണമെന്ന നിലപാടിലാണ് പരാതിക്കാർ. ദേശസാൽകൃത ബാങ്കുകളുടെ ഉദ്യോഗസ്ഥർ പ്രതിസ്ഥാനത്തുണ്ട് എന്നു സംശയിക്കുന്ന സാഹചര്യത്തിൽ സിബിഐ, ഇഡി അന്വേഷണ ഏജൻസികൾ കേസ് അന്വേഷിക്കണം എന്നാണ് ആവശ്യം.

ഇയാളിൽ നിന്ന് പൊലീസ് നിരവധി വ്യാജ പാസ്പോർട്ട്, ആധാർ, പാൻകാർഡ് തുടങ്ങിയവയാണ് കണ്ടെത്തിയത്. നിരവധിപ്പേരുടെ വസ്തു വകകൾ പണയപ്പെടുത്തിയായിരുന്നു തട്ടിപ്പ്. ഇതിനകം ഏഴിലധികം പേർ പരാതിയുമായി രംഗത്തെത്തിയിട്ടുണ്ട്. പരാതികളെ തുടർന്ന് തമിഴ്നാട്ടിൽ നിന്നായിരുന്നു അറസ്റ്റ്.

സിബിൽ സ്കോർ ഇല്ലാത്തതിനാൽ വായ്പ ലഭിക്കാത്തവർക്ക് തന്റെ കമ്പനിയിൽ പങ്കാളിത്തം നൽകാമെന്നു പറഞ്ഞു രേഖകളും മറ്റു ഈടുകളും സ്വന്തമാക്കി ഇവ ഉപയോഗിച്ചായിരുന്നു തട്ടിപ്പു നടത്തിയത്. കരം അടച്ച രസീത് ഉൾപ്പടെ കൃത്രിമമായി നിർമിച്ചു. 2017ൽ ബാങ്കിൽ നിന്നു ലോൺ എടുത്തു നൽകാമെന്ന് അറിയിച്ച് ആലുവ സ്വദേശിയിൽ നിന്ന് സ്ഥലവും വീടും ഈടു വച്ച് 19 ലക്ഷത്തിലേറെ കടമെടുത്തു. സ്ഥലം ഉടമയ്ക്ക് മൂന്നര ലക്ഷത്തിൽ താഴെ മാത്രം തുക നൽകി ബാക്കി ഇയാൾ തട്ടിയെടുക്കുകയും പിന്നീട് ലോൺ പുതുക്കി 64 ലക്ഷം രൂപ വായ്പ എടുക്കുകയും ചെയ്തു. സംഭവത്തിൽ പരാതി നൽകിയ വീട്ടുടമ പ്രകാശൻ വൈകാതെ ഹൃദയാഘാതം മൂലം മരിച്ചു. 

Share via
Copy link
Powered by Social Snap